
Izifundiswa Zishicilele Izincwadi Ezimbili Ngobufundiswa Bokufundisa Nokufunda
Click here for English version
Izifundiswa ezimbili zase-UKZN zibalwa nabanye abahleli bezincwadi eziyingqophamlando ezicwaninga ngezinto ezimqoka ngemfundo ngalesi sikhathi sobuchwepheshe bese zikhanyisa ngomkhakha wemfundo oshintshayo nokuhlangana kwawo nobuchwepheshe. Zingubufakazi bokuzinikela nolwazi lwabahlei oDkt Upasana Singh (Umholi Wezifundo eMkhakheni weZinhlelo ZoLwazi noBuchwepheshe e-UKZN), uSolwazi Sid Nair (uSolwazi Ngokuhlonishwa eSikoleni SezokuPhatha, Ezobuchwepheshe BokuXhumana neZokuLawula), uSolwazi Rashmi Watson (wase-Australia) noSolwazi Susana Gonsalves (wase-Portugal).
Kwi-Academic Quality and Integrity in the New Higher Education Digital Environment: A Global Perspective, u-Singh, u-Nair no-Watson babheka izinto ezimqoka izikhungo zemfundo ephakeme ezibhekene nazo emhlabeni jikelele, ikakhulukazi ngemva kokubheduka kwe-COVID-19. Le ncwadi ikhombisa ucwaningo olubanzi lwemizamo eyenziwe yizikhungo zemfundo ukuqinisekisa izinga lokufundisa nelokufunda endimeni yobuchwepheshe bokuxhumana. Njengoba ibhalwe ngababhali basemhlabeni jikelele, iveza ukuthi isithunzi semfundo singavikelwa kanjani ngesikhathi sokuhlolwa ngaphansi kwesimo sokwenza izinto ngobuchwepheshe. Le ncwadi iyinqolobane emqoka kubafundisi abaphokophele ukuhambisana nezinga lasemhlabeni jikelele nokuthi izifundo zezikhungo zemfundo ephakeme zihlonipheke.
Incwadi yesibili ethi Digital Teaching, Learning, and Assessment: The Way Forward ingumphumela wezingxoxo ebeziqhubeka phakathi komphakathi wabantu abafundisayo nabafundayo ngekusasa lemfundo. Njengoba u-Singh, u-Nair no-Gonsalves bengabahleli bayo, iyinkundla yabafundisi, abaphathi, abacwaningi nezinhlangano ezilawulayo zokucwaninga imibono nezinqubo ezizobumba umkhakha wezemfundo. Le ncwadi iyinqolobane emqoka kubantu abazinikele ekuhlinzekeni izitshudeni ngolwazi lokufunda ngesikhathi esingemva kobhubhane.
Zombili lezi zincwadi zocwaningo zingumsebenzi wokudlondlobala kobuchwepheshe namandla emfundo okushintsha izinto. Njengoba izikhungo zemfundo zemukela izindlela zobuchwepheshe zokufundisa nezokufunda, kumqoka ukubhekana nezinselelo namathuba okuhambisa nazo. Lezi zincwadi azigcini nje ngokufundisa ngesimo samanje semfundo kepha futhi ziveza ukuthi limi kanjani ikusasa.
Abahleli banolwazi olunqala lwemikhakha yabo namava, okuqinisekisa ukuthi izincwadi zinemibono ehlukene. Iqhaza labo emkhakheni wemfundo nokuzinikela kwabo ekushintsheni ikusasa lemfundo kuyahlaluka ekubhaleni kwabo.
Lezi zincwadi ziyingqophamlando emphakathini wezemfundo futhi zingubufakazi bengxoxo ekhona nokubambisana okudingekayo ukubhekana nokujula kwemfundo ngesikhathi sobuchwepheshe bokuxhumana.
Umbhali: yiNdabaOnline
Izithombe: Zithunyelwe